歐洲一場大風雪令英國大批學生滯留倫敦Heathrow機場，不能趕及回港過冬，睇新閒見到有家長與能返港的子女相擁而哭，有港生形客機場似集中營，有冇咁誇張呀？又唔係死裡逃生(大吉利是)，機場起碼有水有電有暖氣啊，點同打仗比呀，天氣差飛機飛唔到你都冇計架，你嘈機場航空公司有乜用？不如諗吓Plan A, B, C… 或者大不了咪stay多陣咯，因意外趕唔切返港過節冇人會怪你架，聽報導講有學生講大話同航空公司講要返港奔喪因而得到機位，有人大讚佢醒目，我不敢苟同，如果因為逃離地震、火山爆發、疫症、戰亂就話啫，真唔知佢父母點諗。又聽到話有學生病，投訴機場醫生只係叫佢飲多d水，我唔知佢有乜病，但呢樣野係香港人被種壞哂，外國睇醫生對輕嘅病例如傷風咁都唔會比药，都係叫你休息多d飲多d水，你知啦，香港醫生比少d药病人都會話呃錢 (英國是醫药分家的，即是醫生寫紙你去药房買药)。
點解我個標題係咁？去外國係一個好好機會鍛練獨立，學自己照顧自己，我去英國讀書時父母都冇過問乜野，只係話錢得咁多，自己攪掂。為咗盡慳，自己學煮飯帶lunch食、去街市同local買餸講價、冬天唔開暖氣(英國d屋又大又舊，開暖氣成個鐘都唔暖)、返學校gym沖涼慳gas、打長途電話都只係出咗成績或報平安嘅短短一分鐘內、死慳死抵去歐州Backpack丐兒團訓火車站… etc。係外國生活幾年令我睇野闊咗、獨立咗(而家阿爸阿媽反而投訴)、同埋對英文同英國嘅文化都有更深了解。當然我亦見過不少到外國讀書嘅失敗例子，例如終日掛住攪男女關係攪大咗人個肚、日日蒲賭塲欠下一屁股債、掛住練車去clubbing周圍wet、或者掛住做餐館part time連學都唔返、去外國生活英文冇進步…等，呢d例子屢見不鮮。好多時d家長話仔女係香港讀唔到書就掟佢地去外國讀，呢d真係一個太easy的藉口!
所以我要多謝我父母沒有婆婆媽媽、不做helicopter parent，比我成長，而家可以照顧自己的家庭。奉勸各位家長「玉不琢不成器」啊！
(有報導話今次特區政府反應超快派包機係因為有好多公務員高官仔女，如果係事實我就真係冇野講)
Krates' Blog 