發水樓大家近期都聽唔少，有冇聽過學生成績都可以發水呢? 成績發水就係話明明同學d野只值C你都比B甚至A grade佢，咁咪發水囉。最近睇到英國一份報紙(The Telegraph) 講英國d大學發水情況頗嚴重。先要明白英國大學學位畢業時點分高低(香港用相同的制度)，最top嘅就係1st Class Hon. (簡稱First)，限住就係2nd Class Upper Division Hon. (簡稱2.1 or Two-one), 再跟住就係2nd Class Lower Division Hon. (簡稱2.2 or Two-two)，之後就係3rd Class Hon.，成績再差d就攞Non-hon. degree 咯。我讀書年代只有極少數人可以攞1st，一班80人最多得兩個，攞到個d學生真係神級，如果你想入研究院，好多時都會要求學生成續有2.1或以上。講番呢份新聞話英國一d大學，例如，Imperial College 同 Warwick Univ. (都是英國的十大名U) 喺2010年有80%畢業生攞到2.1或以上，比較1970年分別只有49%同39%真係多咗好多; Bath Univ. 1970年只有35%, 舊年就有76%，增幅有多過一倍；威廉皇子讀果間St. Andrews Univ. 喺1970年只有25%, 舊年就有82%，嘩！成三倍增幅。好多U比Firsts 都比1970年多，由幾個percent 到舊年十幾二十個percent！增幅最多嘅係一d由Polytechnic轉University的學校 (轉做大學可以自己頒學位，自主性大d)，例如Northampton University (以前叫Nene College of Higher Education)，97年只有2%學生攞Firsts，但舊年就有14%，升幅達7倍之多！報導話英國大學咁做係因為要爭排名同埋研究經費。
睇完呢篇報導心都傷，學生們可能覺得好正呀，明明自己係C grade料子被發水到B或A grade，有著數喎，但係有冇料一試就知，你畢業出黎做野老闆會好快知，你再讀上去果間學校更加易知，情況嚴重d你間大學會比人blacklist，唔係講小架，我讀大學年代時，傳聞獅子銀行有個list，你喺呢個list入面嘅大學畢業就算攞1st Hon都唔會有機會受僱用。英國國會都話要徹查，梗係啦，如果間間大學都發水，仲邊有人對英國大學畢業生有信心，到時冇人去英國讀degree就大獲囉 (例如你睇完TVB 8Jan2011 新閒透視講學術做假，你還會對大陸的大學資歷有信心嗎？雖然可能只係一小撮害羣之馬)。咁你會問，乜d大學校長唔知發水嘅禍害咩？一定知啦，點解都照做？我估校長們承受非常大的壓力，要短期內交出成績，需然人人都知攪教育係十年以上嘅投資…
本地大學成績發水情况嚴唔嚴重呢？政府現正力推私立大學，到時大學之間競爭更大，會唔會發水情況嚴重呢？邊個會監管呢？做咗大學之後就有高度自主囉喎，而家已經聽到好多老師講話要肥學生係勁難，幾年後學位多咗，怎樣保持質素才是重要！十年後會有更多人有degree，到時employer會問「你喺邊間畢業架？」，所以千祈唔好揀d冇質素嘅大學黎讀，會影嚮一生架！
Krates' Blog 