最近網上及報紙報導一位攝影師為求達到特別效果，疑在古蹟摩星嶺炮台放火，事件在攝影討論區引起廣泛討論，據聞事件已由警方接手調查，有人話攝影行業競爭大，攝影師要各出奇謀爭取相片的”wow factor”去爭取更多客户，網上有人批評話香港人沒有創意、藝術感，支持攝影師用一切方法去創作好作品，當然主流意見喺反對破壞公物去達到自己嘅目的。我唔知呢位攝影師Ben喺咪大師，去佢網頁睇吓價錢，一日嘅pre-wedding收大概四萬蚊，我都唔知係貴定平，但如果佢真係放過火我覺得就唔啱，客人也要負上一定責任，我奇怪就係佢仲好意思post照片出黎，証明佢唔覺得有問題?咁先至驚，專業攝影師都冇專業操守！放火呢件事都算黑白分明，但例如你去花展見d人用手將d花花草草搬吓位置為求一個好角度影幅靚相，又例如見過d人將d生物(如蟲、蝴蝶、海星等)由一處搬去另一處因為想幅相構圖好d，咁樣又點呢？咁之前有藝術家將人地中環啇店大logo塗鴉，又最近有人周街噴畫支持內地藝術家… 呢d行為又係咪冇品呢？現在嘅教育一面倒用成績去量度學生，邊會有人理會德育的培訓吖。報紙之前都報導舉行緊嘅PIXAR展覽是禁止拍照，d人都唔理照影仲post上Facebook添！我諗起十幾年前去法國羅浮官參觀，只有中國/香港人最不守規矩的，管理員對華人都份外有戎心，當時我親眼見過一d導遊鼓勵團友摸d展品，話咁遠飛嚟，幾歹都摸吓啦！我當時都想揾loan損！教書咁耐，乜類型的學生都見過，老實講，我寧願教一d有品但成績差嘅學生都好過冇品但成績好嘅學生，尤其是d學生用唔誠實的方法騙取分數，不過家陣學生分分鐘發投訴信嘅情況之下，邊有學校會花精神講品德呀！
Krates' Blog 